Meer oor my
Lekker mense!
Ek is Carien Botha – aktrise, motiveringspreker, seremoniemeester, ma van twee, en ’n vrou met ’n groot liefde vir mense, stories en lag. Jy mag my dalk ken as die mal, maar geliefde Blapsie uit Molly en Wors, of dalk as Susan Steyn – die passievolle graadhoof in E-Extra se Die Fakulteit. Oor die jare het ek ’n plek in kykers se harte verwerf deur karakters tot lewe te bring wat eg, snaaks, emosioneel en soms net heerlik skeef is.
Maar daar’s méér aan my as net wat jy op die skerm sien. Ek gebruik my storie, ervaring en humorsin op die verhoog as motiveringspreker en seremoniemeester om mense te inspireer, te vermaak en aan die lag te kry of dit nou by ’n korporatiewe geleentheid, vrouekamp of spesiale funksie is.
Met twee SAFTA-benoemings agter my naam vir Elke Skewe Pot, en dekades se ervaring op verhoog en televisie, het ek geleer dat mense smag na egtheid – en dis presies wat ek bring.
Of jy nou op soek is na iemand wat jou gehoor kan aanraak én laat lag, of net ’n bietjie lig wil bring na ’n spesiale geleentheid – ek’s net ’n bespreking weg.
My Loopbaan
My loopbaan strek oor meer as ’n dekade in die Suid-Afrikaanse vermaaklikheidsbedryf. Ek het nie die beroep gekies nie – ek is daartoe geroep! Wat begin het as ’n vriendin se uitnodiging om aan oudisies deel te neem (en dit te kry teenoor 3 000 ander meisies), het my lewe se hele rigting verander.
My groot deurbraakrol as Blapsie in Molly en Wors het my deel gemaak van elke Afrikaanse gesin wat daardie tyd saam met ons kon sit en lag. Verder het my vertolkings van komplekse, realistiese karakters in reekse soos Elke Skewe Pot en Die Fakulteit my geloofwaardigheid as aktrise verder versterk.
.svg)
Buite die skerms
Ek het ook ’n sterk teenwoordigheid op die verhoog as spreker en seremoniemeester. My vermoë om gehore tegelyk aan die lag én aan die dink te kry, maak my ’n gewilde keuse vir korporatiewe funksies, vrouegeleenthede en spesiale projekte. Elke optrede is vir my ’n geleentheid om egtheid, energie en empatie na die verhoog te bring.
My werk – of dit nou agter die kamera of op die verhoog is – word gekenmerk deur uniekheid, menslikheid, humor en ’n opregte vermoë om mense te raak. Soms is dit deur ’n karakter. Soms deur ’n storie. En partymaal is dit net daardie een oomblik van herkenning en hoop wat bly hang lank nadat die ligte doof.